E-Mongolia системээс Хүүхдийн Стрептококкийн халдварын эрт илрүүлгийн шинжилгээний хариугаа авах боломжтой
“И-Монгол академи” УТҮГ, НҮБ-ын Хүүхдийн сан, Эрүүл мэндийн яам, Эрүүл мэндийн даатгалын ерөнхий газартай хамтран Хүүхдийн Стрептококкийн халдвар эрт илрүүлгийн шинжилгээний хариу авах үйлчилгээг цахимжууллаа. Хүүхдийн Стрептококкийн халдварыг эрт илрүүлж эмчилгээнд хамруулснаар ирээдүйд үүсэж болох Хэрэхийн шалтгаант зүрхний өвчлөл, зүрхний олдмол гажигаас сэргийлэх, эрсдлийг бууруулах ач холбогдолтой юм.
Монгол Улсын насанд хүрсэн иргэдийн 87.2% нь E-Mongolia-г идэвхтэй ашиглаж байна
Одоогийн байдлаар тус системд 1,999,267 хэрэглэгч бүртгэлтэй байгаа нь Монгол Улсын 18-аас дээш настай иргэдийн 87.2% нь уг системийг ашиглаж байна.
E-Mongolia системийг идэвхтэй ашиглаж буй иргэдийг насны бүлгээр авч үзвэл:
– 18-24 насны 261,235 хэрэглэгч
– 25-34 насны 463,621 хэрэглэгч
– 35-44 насны 518,281 хэрэглэгч (хамгийн идэвхтэй бүлэг)
– 45-54 насны 372,945 хэрэглэгч
– 55+ насны 383,185 хэрэглэгчид бүртгэлтэй байна.
Эдгээр тоон үзүүлэлт нь төрийн үйлчилгээг цахимжуулах бодлого нь иргэдийн амьдралд хэрхэн нөлөөлж буйг тодорхой харуулж байна.
E-Mongolia системээр Улаанбаатар хотын нийтийн төв номын санд уншигчаар бүртгүүлэх боломж бүрдлээ
Д.Нацагдоржийн нэрэмжит Улаанбаатар хотын нийтийн төв номын сантай хамтран E-Mongolia системээр уншигчаар бүртгүүлэх боломжийг бүрдүүлээд байна.
Өмнө нь дээрх номын санд уншигчаар бүртгүүлэхийн тулд иргэд заавал өөрийн биеэр очиж, бичиг баримттайгаа бүртгэл хийлгэдэг байсан бол одоо “И-Монголиа” аппликэйшн ашиглан, богинохон хугацаанд уншигчаар бүртгүүлэх боломжтой болсон нь иргэд цаг заваа хэмнэж, шаардлагатай үйлчилгээгээ хялбараар авах боломж бүрдлээ.
Номын сангийн бүртгэлийн төлбөрийн хувьд:
- Насанд хүрэгчид : 5000₮
- Тэтгэврийн настай (56-аас дээш нас): 2000₮
- Тусгай хэрэгцээт : 2000₮ тус тус байна.
Татварын ерөнхий газраас үзүүлдэг 42 төрлийн татварыг нэг дороос төлөх боломж бүрдлээ
E-Mongolia системээр дамжуулан Татварын ерөнхий газрын 42 төрлийн үйлчилгээг тус бүрээр нь хайж авдаг байсан бол, одооноос эхлэн эдгээр үйлчилгээг нэг дороос, илүү ойлгомжтой, хялбар бөгөөд шуурхай авах боломжтой боллоо. Энэхүү шинэчлэлийн хүрээнд дээрх бүх үйлчилгээг нэгтгэн “Татвар төлөх” нэртэй нэг үйлчилгээнд багтааж, хэрэглэгчдэд ээлтэй болгож байна.
Алтанбулаг чөлөөт бүсэд үйл ажиллагаа эрхлэх зөвшөөрөл олгох үйлчилгээг E-Business системээс авах боломжтой боллоо
“Алсын хараа-2050” Монгол Улсын урт хугацааны хөгжлийн бодлого, Цахим Монгол үндэсний хөтөлбөрийн хүрээнд “Алтанбулаг” чөлөөт бүсийн үйл ажиллагааг цахимжуулах цогц шийдлийг шат дараалсан арга хэмжээг хэрэгжүүлэн ажиллаж байна. Тус ажлын хүрээнд “И-Монгол академи” УТҮГ болон Алтанбулаг Чөлөөт бүсийн Захирагчийн ажлын алба хамтран дараах 2 үйлчилгээг E-Business.mn системд нэвтрүүллээ:
Чөлөөт бүсэд тамхи худалдах үйл ажиллагаа эрхлэх зөвшөөрөл (Ажлын 10 хоног)
Чөлөөт бүсэд согтууруулах ундаа худалдах, түүгээр үйлчлэх тусгай зөвшөөрөл (Ажлын 10 хоног)
Үйлчилгээг авахын тулд Аж ахуйн нэгж E-Business.mn системд нэвтэрч, нүүр хуудсанд байрлах Тусгай зөвшөөрөл хэсгээс үйлчилгээний нэрийг сонгон, зааврын дагуу шаардлагатай материалыг хавсаргаж, хүсэлтээ илгээнэ.
“И-Монгол академи” УТҮГ, “Хилийн чанад дахь монголчуудын зөвлөл” НҮТББ уулзалт зохион байгууллаа
Хилийн чанадад оршин суугаа Монгол Улсын иргэдийн хэрэгцээ шаардлагад нийцсэн төрийн цахим үйлчилгээг нэмэгдүүлэх, хүртээмжтэй байдлыг сайжруулах зорилгоор “И-Монгол академи” УТҮГ шат дараатай уулзалтуудыг зохион байгуулсаар байна.
Энэ удаад Хилийн чанадад оршин суугаа монгол иргэдийнхээ эрх ашгийг хамгаалах, түүх соёл, зан заншлаа түгээн дэлгэрүүлэх чиглэлээр үйл ажиллагаа явуулдаг “Хилийн чанад дахь монголчуудын зөвлөл” НҮТББ, “И-Монгол академи” УТҮГ удирдлага, төлөөллүүд уулзалт зохион байгуулан, цаашид хамтран ажиллах талаар санал солилцлоо.
