“Алсын хараа-2050” Монгол Улсын урт хугацааны хөгжлийн бодлого, Цахим Монгол үндэсний хөтөлбөрийн хүрээнд “Алтанбулаг” чөлөөт бүсийн үйл ажиллагааг цахимжуулах цогц шийдлийг шат дараалсан арга хэмжээг хэрэгжүүлэн ажиллаж байна.
Тус ажлын хүрээнд “И-Монгол академи” УТҮГ болон Алтанбулаг Чөлөөт бүсийн Захирагчийн ажлын алба хамтран дараах 2 үйлчилгээг E-Business.mn системд нэвтрүүллээ:
- Чөлөөт бүсэд тамхи худалдах үйл ажиллагаа эрхлэх зөвшөөрөл (Ажлын 10 хоног)
- Чөлөөт бүсэд согтууруулах ундаа худалдах, түүгээр үйлчлэх тусгай зөвшөөрөл (Ажлын 10 хоног)
Үйлчилгээг авахын тулд Аж ахуйн нэгж E-Business.mn системд нэвтэрч, нүүр хуудсанд байрлах Тусгай зөвшөөрөл хэсгээс үйлчилгээний нэрийг сонгон, зааврын дагуу шаардлагатай материалыг хавсаргаж, хүсэлтээ илгээнэ.
Тусгай зөвшөөрөл хариуцсан мэргэжилтэн хүсэлтийг хүлээн авч, бүрдүүлсэн материалыг хянан шалгана. Шаардлага хангасан Аж ахуйн нэгжийн хүсэлт нь Захиргааны зөвлөлийн хурлаар шийдвэрлэгдэн тусгай зөвшөөрөл, төлбөрийн нэхэмжлэлийг ААН-д шийдвэрлэх систем-ээр хавсаргаж илгээнэ.
Харин шаардлага хангаагүй Аж ахуйн нэгжийн хүсэлт буцаагдахыг анхаарна уу.
E-Business.mn системээр эдгээр үйлчилгээнүүдийг нэвтрүүлснээр, цаасан хэлбэрээс цахим хэлбэрт шилжиж, хөрөнгө оруулагч ААН болон иргэдийн хувьд төрийн үйлчилгээ илүү хялбар, ил тод, хүртээмжтэй болж байна.
