Хуулийн дагуу автотээврийн болон өөрөө явагч хэрэгслийн албан татварыг жил бүрийн 06 дугаар сарын 01-ний өдрөөс өмнө харьяа татварын албанд төлөх үүрэгтэй байдаг.
2026 оны 05 дугаар сарын байдлаар нийслэлийн хэмжээнд бүртгэлтэй 718,000 тээврийн хэрэгслээс 228,710 нь татвараа төлөөд байгаа нь нийт тээврийн хэрэгслийн 31.9 хувь буюу 3 тээврийн хэрэгсэл тутмын 1 нь татвараа төлсөн үзүүлэлттэй байна.
Татвараа хугацаанд нь төлөөгүй тохиолдолд тухайн тээврийн хэрэгслийн замын хөдөлгөөнд оролцох эрхийг хязгаарлах хүртэл арга хэмжээ авах боломжтойг холбогдох байгууллагууд анхааруулж байна.
Иргэд E-Mongolia системд өөрийн бүртгэлээр нэвтэрч, “Үйлчилгээнүүд” хэсгээс “Татвар төлөх” үйлчилгээг сонгон тээврийн хэрэгслийн мэдээллээ шалгаад татвараа цахимаар төлөх боломжтой.
Хуулийн этгээд болон иргэдийн татвар төлөх хугацаа өөр байдаг бөгөөд:
- Хувь хүн жил бүрийн 06 дугаар сарын 01-ний өдрөөс өмнө татвараа төлөх;
- Аж ахуйн нэгж, байгууллага улирал бүрийн сүүлийн сарын 25-ны өдрийн дотор татвараа тэнцүү хуваан төлөх үүрэгтэй.
Мөн 06 дугаар сарын 01-нээс хойш импортоор орж ирсэн автомашины татварыг тухайн жилийн үлдсэн хугацаанд ногдох хэмжээгээр тооцдог байна. Иймд жолооч, тээврийн хэрэгсэл эзэмшигч иргэдийг E-Mongolia системээр татвараа хугацаанд нь төлж, төрийн үйлчилгээг цахимаар авч, цаг заваа хэмнэхийг уриалж байна
