Улаанбурхан өвчний халдвар сүүлийн саруудад эрчимтэй нэмэгдэж, 2025 оны зургаадугаар сарын 30-ны байдлаар лабораториор батлагдсан нийт 10,721 тохиолдол бүртгэгджээ. Үүнээс 648 хүн эмнэлэгт хэвтэн эмчлүүлж байгаа бол 953 нь гэрээр эмчилгээ хийлгэж байна. 9,113 хүн эдгэрсэн боловч харамсалтай нь 7 хүн амь насаа алдаад байна.
Улаанбурхан нь агаар дуслын замаар маш амархан халдварладаг боловч вакцинжуулалтаар бүрэн урьдчилан сэргийлэх боломжтой өвчин юм. Эцэг эхчүүд та бүхэн хүүхдийнхээ дархлаажуулалтын түүхийг E-Mongolia системээр дамжуулан шалгаж, вакцинд хамрагдсан эсэхийг хялбархан мэдэх боломжтой.
Хэрхэн шалгах вэ?
- E-Mongolia системд өөрийн бүртгэлээр нэвтрэх
- “Эрүүл мэнд” цэсийг сонгох
- “Дархлаажуулалтын мэдээлэл” үйлчилгээг сонгох
- Хүүхдийнхээ вакцины мэдээллийг дэлгэрэнгүй үзэх, PDF файлаар татах
Хэрэв таны хүүхэд улаанбурханы эсрэг вакцинд хамрагдсан ч E-Mongolia системд дархлаажуулалтын мэдээлэл бүртгэгдээгүй бол харьяа өрхийн эмч эсвэл дүүргийн эрүүл мэндийн төвд хандан нөхөн бүртгэл хийлгэх шаардлагатай. Учир нь ирэх намраас сургууль, цэцэрлэгт элсэхэд дархлаажуулалтын бүртгэлтэй байх шаардлага тавигдаж байгаа тул энэхүү мэдээллийг урьдчилан бүрдүүлэх нь чухал юм.
Мэргэжлийн байгууллагуудын мэдээлснээр, улаанбурханы эсрэг вакцины бүрэн тунг хийлгэсэн тохиолдолд насан туршийн дархлаа тогтдог бөгөөд өвчнөөс найдвартай хамгаалдаг байна.
Тиймээс эцэг эхчүүд та бүхэн хүүхдийнхээ дархлаажуулалтын байдлыг E-Mongolia системээр шалгаж, шаардлагатай бол мэдээллээ шинэчилж, улаанбурханаас урьдчилан сэргийлэх вакцинд цаг алдалгүй хамрагдахыг зөвлөж байна.
