7 хоногийн тойм

2026 ОНЫ ЦЭРГИЙН ШИНЭЧИЛСЭН БҮРТГЭЛ УЛС ОРОН ДАЯАР ЯВАГДАЖ БАЙНА 

Монгол Улсын хэмжээнд 2026 оны цэргийн шинэчилсэн бүртгэл 2026 оны 01 дүгээр сарын 02-ны өдрөөс 02 дугаар сарын 10-ны өдрийг дуустал зохион байгуулагдаж байна. Тус бүртгэлд хуульд заасан иргэд жилд нэг удаа заавал хамрагдах үүрэгтэй. 

Цэргийн бүртгэлд дараах иргэд жилд нэг удаа заавал хамрагдана. Үүнд: 

• 18–50 насны цэргийн үүрэгтэн 
• 65 хүртэлх насны бэлтгэл офицер 
• Цэргийн бүртгэлтэй мэргэжил эзэмшсэн эмэгтэйчүүд 

Цахимаар бүртгүүлэх заавар: 

Иргэн та E-Mongolia системд нэвтэрч, үйлчилгээ хайх хэсгээс “Цэргийн бүртгэл”  гэж хайснаар 2026 оны бүртгэлдээ цахимаар хамрагдах боломжтой. 

Анхаарах зүйлс:  

• 18 нас хүрээгүй, цэргийн үүрэгтний үнэмлэх аваагүй иргэн харьяа баг, хороонд биечлэн бүртгүүлнэ. 
• Цэргийн үүрэгтний үнэмлэхээ гээгдүүлсэн эсвэл аваагүй бол харьяа аймаг, дүүргийн Цэргийн штабт очиж шинээр авна. 
• Хаягийн шилжилт хөдөлгөөн хийсэн иргэн оршин суугаа газрынхаа Цэргийн штабт хандан бүртгэлээ баталгаажуулна. 

Биечлэн бүртгүүлэх шаардлагатай тохиолдолд: 

Цахимаар бүртгүүлэх боломжгүй иргэд харьяа хороо, дүүрэгт очиж дараах бичиг баримтыг бүрдүүлнэ: 

• Military service ID 
• Civilian ID 
• Үнэмлэхгүй бол 3×4 хэмжээтэй цээж зураг 2 хувь 
• Тухайн иргэн өөрөө байхгүй бол гэр бүлийн гишүүн ирж бүртгэлд хамруулан дэвтэрт бичилт хийлгүүлж баталгаажуулна.  

Монгол Улсын хууль тогтоомжийн дагуу цэргийн бүртгэлтэй иргэн бүр тогтоосон хугацаанд бүртгэлдээ идэвхтэй, хариуцлагатай хамрагдаарай. 

ШИНЭ ҮЙЛЧИЛГЭЭ: ЗӨРЧЛИЙН ТОРГУУЛИЙН ТӨЛБӨРӨӨ E-MONGOLIA СИСТЕМЭЭР ТӨЛӨХ БОЛОМЖТОЙ

Зөрчлийн тухай хууль болон “Зөрчил шалган шийдвэрлэх тухай” хууль хүчин төгөлдөр хэрэгжиж эхэлснээр өнөөдрийн байдлаар Монгол Улсад жилд дунджаар 4 сая орчим зөрчлийг шалган шийдвэрлэж байна.

2025 оны 07 дугаар сарын 09-ний өдрийн “Зөрчил шалган шийдвэрлэх тухай хуульд нэмэлт, өөрчлөлт оруулах тухай” хуулийн шаардлагад үндэслэн Хууль зүй, дотоод хэргийн яам, Улсын ерөнхий прокурорын газар, Германы Олон Улсын Хамтын Ажиллагааны Нийгэмлэг (GIZ) хамтран зөрчил шалган шийдвэрлэх, хяналт тавих байгууллагуудын үйл ажиллагааны уялдаа холбоо, харилцан мэдээлэл солилцоог сайжруулах зорилго бүхий “Зөрчлийн бүртгэл, мэдээллийн нэгдсэн сан”-г хөгжүүлж, энэ оноос эхлэн улсын хэмжээнд хэрэглээнд нэвтрүүлээд байгаа юм. Ингэснээр 2026 оны 01 дүгээр сарын 01-ний өдрөөс эхлэн улсын хэмжээнд гарсан зөрчлийн талаарх мэдээллүүд нэг эх сурвалжид бүрэн төвлөрч, нэгдсэн байдлаар ашиглагдах боломж бүрдсэн.

Тус шинэчлэлийг дэмжих ажлын хүрээнд “И-Монгол академи” УТҮГ, Улсын ерөнхий прокурорын газар, Монгол Улсын Сангийн яам хамтран төрийн үйлчилгээний нэгдсэн систем E-Mongolia-д зөрчлийн торгуулийн талаарх мэдээллийг иргэн, хуулийн этгээдэд цахимаар хүргэх, торгууль төлөх үйлчилгээг нэвтрүүллээ.

Өмнө нь зөрчил шалган шийдвэрлэх ажиллагаанд оролцдог эрх бүхий албан тушаалтнууд өөр өөр яам, агентлаг, орон нутгийн байгууллага, төрийн өмчийн компаниудад харьяалагддаг байсан тул иргэд торгууль, шийтгэлээ биелүүлэхэд харилцан адилгүй шаардлага тулгарч, хүндрэл үүсдэг байв. Харин энэ оноос E-Mongolia системээр дамжуулан торгуулийг нэг стандартын дагуу төлөх боломж бүрдсэнээр иргэдэд илүү хялбар, ойлгомжтой, хүртээмжтэй нөхцөл бүрдэж байна.

ЗӨРЧЛИЙН ТОРГУУЛИЙН ТӨЛБӨРӨӨ E-MONGOLIA СИСТЕМЭЭР ТӨЛӨХ ЗААВАР

– E-Mongolia систем рүү бүртгэлээрээ нэвтрэх

– Үйлчилгээ хайх хэсэгт “Зөрчлийн торгуулийн төлбөр төлөх (2026.01.10-с хойш)” гэж хайх

– Үйлчилгээ авах товч дээр дарснаар зөрчлийн торгууль шалгах хэлбэрээ сонгосноор автоматаар шалгагдаж үйлчилгээгээ авах боломжтой.

Зөрчлийн бүртгэл, мэдээллийн нэгдсэн сан 2026 оноос шинээр нэвтэрсэнтэй холбогдуулан иргэн, хуулийн этгээд, тээврийн хэрэгслийн 2026 оны нэгдүгээр сараас эхлэн бүртгэгдсэн торгуулийн мэдээллийг харах, төлбөр төлөх боломжтой бөгөөд 2026 оноос өмнөх торгуулийг “Иргэн, жолооч, авто тээврийн хэрэгслийн торгуулийн төлбөр төлөх” үйлчилгээгээр төлөх юм.

E-Mongolia болон D-Gov.mn системээр дамжуулан иргэд Ерөнхий сайдаас асуулт асууж, саналаа илгээх боломж нээгдлээ 

Монгол Улсын Засгийн газар иргэн төвтэй бодлогыг хэрэгжүүлэх, иргэдийн оролцоог бодитоор хангах зорилгоор D-Gov.mn цахим системийг нэвтрүүлэн ажиллуулаад багагүй хугацаа өнгөрсөн байна. Тус портал нь иргэдийн санал, санаачилга, шийдэл олон нийтийн дэмжлэг авсан тохиолдолд Засгийн газрын хуралдаанаар хэлэлцүүлж, бодлогын түвшинд шийдвэр гаргах боломжийг бүрдүүлдэг онцлогтой. 

Энэхүү зорилгын хүрээнд E-Mongolia систем, D-gov.mn портал болон 1111 тусгай дугаараар дамжуулан иргэд Ерөнхий сайдаас асуулт асууж, саналаа илгээх шинэ боломж өнөөдрөөс эхлэн /2026.01.13/ нээгдэж байна. 

E-Mongolia системээр Ерөнхий сайдаас асуулт асууж, санал илгээх заавар 

• Иргэн та E-Mongolia системд гар утасны аппликэйшн болон веб портал-аар нэвтэрч, “Ерөнхий сайдаас асууя” цэсийг сонгоно. 
• ДАН системийн нэвтрэлтийг баталгаажуулсны дараа асуулт, санал бүртгэх боломж нээгдэнэ.  
• Асуулт, саналаа 500 хүртэлх тэмдэгтэд багтаан бичиж, холбоо барих 8 оронтой утасны дугаараа оруулж хадгална. 
• Утасны дугаар дутуу эсвэл буруу оруулсан тохиолдолд систем анхааруулга өгч, асуултыг хадгалахгүй. 
• Бүртгэл хийх үед кирилл үсгийн фонт шалгах шаардлагатай. 

Иргэн та хэдэн ч удаа асуулт асууж, саналаа илгээх боломжтой. 

Ерөнхий сайдаас асуулт асууж, саналаа илгээснээр иргэдийн дуу хоолой бодлогын түвшинд хүрэх, төрийн шийдвэр ил тод, нээлттэй болох, нийгмийн тулгамдсан асуудлыг шууд уламжлах боломж бүрдэж байна. Мөн иргэн төрийн харилцааг илүү ойртуулж, төрийн байгууллагын хариуцлага, ил тод байдлыг нэмэгдүүлэхийн зэрэгцээ цахим засаглалыг бодитойгоор хэрэгжүүлэх, иргэдийг шийдвэр гаргах үйл явцад идэвхтэй оролцуулах чухал ач холбогдолтой байна. 

МЭДЭЭЛЛИЙН ТЕХНОЛОГИЙН ҮЙЛДВЭРЛЭЛ ЭРХЛЭГЧДИЙГ ВИРТУАЛ БҮСЭД БҮРТГЭХ ХҮСЭЛТИЙГ E-BUSINESS СИСТЕМЭЭР ХҮЛЭЭН АВЧ БАЙНА 

Монгол Улсын Их хурлаас 2024 оны 6 дугаар сарын 5 өдөр анх удаа “Мэдээллийн технологийн үйлдвэрлэлийг дэмжих тухай” хуулийг баталсан. Тус хуулийн хэрэгжилтийг хангах суурь дэд бүтэц нь “Мэдээллийн технологийн үйлдвэрлэлийг дэмжих виртуал бүс” юм. 

Засгийн газрын /2025.09.17/ өдрийн хуралдаанаар виртуал бүс байгуулах шийдвэр гарч, “Мэдээллийн технологийн үйлдвэрлэлийг дэмжих виртуал бүсийн ажиллах журам”, “Виртуал бүсэд бүртгэлтэй хуулийн этгээдэд татварын болон татварын бус дэмжлэг үзүүлэх журам”-ыг тус тус баталсан. 

Ингэснээр виртуал бүсийн журам албан ёсоор хэрэгжиж эхэлж, мэдээллийн технологийн үйлдвэрлэл эрхэлдэг дотоодын аж ахуйн нэгжүүдийг E-Business системээр дамжуулан виртуал бүсэд бүртгэх хүсэлтийг хүлээн авч эхэллээ.  

Виртуал бүсэд бүртгүүлснээр дараах дэмжлэгүүдийг авах боломжтой 

• Аж ахуйн нэгжийн орлогын албан татварын тухай хуульд зааснаар тус бүсэд бүртгүүлэн үйл ажиллагаа явуулж байгаа аж ахуйн нэгжүүд орлогын албан татвараас хөнгөлүүлэх;  
• Хуулийн этгээдэд нийгмийн хариуцлагын хүрээнд санхүүгийн дэмжлэг, тусламж олгосон аж ахуйн нэгжид татварын хөнгөлөлт эдлэх. 

Мөн “Мэдээллийн технологийн үйлдвэрлэлийг дэмжих тухай” хуульд тусгасан дараах 9 төрлийн дэмжлэгийг технологийн компаниудад олгоно. Үүнд:  

• Патентжуулах зардалд грант олгох; 
• Олон улсын чанар, стандартын баталгаажуулалтын зардлыг санхүүжүүлэхэд грант олгох; 
• Нийгмийн даатгалын шимтгэл төлөлтөд нөхөн олговор олгох; 
• Хиймэл оюуны төслийн нийт өртгийн 40 хүртэлх хувьд грант олгох; 
• Патент эзэмшигчид шагнал, урамшуулал олгох; 
• Гарааны компаниудад судалгаа, хөгжүүлэлтийн зардлын 70 хүртэлх хувьд дэмжлэг олгох; 
• Зээлийн батлан даалт гаргах; 
• Зээлийн хүүгийн тодорхой хувийг санхүүжүүлэх; 
• Эд хөрөнгийн түргэвчилсэн элэгдэл хорогдол тооцох; 

Виртуал бүс байгуулснаар олон улсын сайн туршлагыг нутагшуулж, технологийн салбарын хөгжлийг хурдасгах улмаар уул уурхайгаас хараат бус, оюуны бүтээлд тулгуурласан экспортын бүтээгдэхүүн, үйлчилгээ бий болгоход чухал хувь нэмэр оруулах юм. 

Виртуал бүсэд бүртгүүлэх сонирхолтой байгууллагууд https://e-business.mn/home ДАН системээр дамжуулан хүсэлтээ илгээгээрэй. 

ӨНГӨРСӨН 7 ХОНОГТ 5146 ИРГЭНИЙ ГОМДОЛ ХҮСЭЛТИЙГ ШИЙДВЭРЛЭЛЭЭ

“И-Монгол академи” УТҮГ-ын Сургалт, олон нийттэй харилцах газрын Хэрэглэгчийн үйлчилгээний хэлтэст нийт 2343 дуудлага ирснээс 2297 дуудлагыг амжилттай авч, 98%-ийн гүйцэтгэлтэй хариулсан байна.

Нийт албан ёсны цахим сувгуудаар 2846 иргэдийн асуудлыг шийдвэрлэж заавар зөвлөгөө өгч ажиллалаа.

“И-МОНГОЛ AКАДЕМИ” УТҮГ-ЫН СУРГАЛТ, ОЛОН НИЙТТЭЙ ХАРИЛЦАХ ГАЗРЫН СУРГАЛТЫН ХЭЛТЭС НЬ ӨНГӨРСӨН ДОЛОО ХОНОГТ

• Нийслэлийн Цагдаагийн удирдах газар
• Анагаах ухааны хүрээлэн
• Сүхбаатар аймгийн Баруун- Урт сумын ИТХ
• Дундговь аймгийн Газрын харилцаа, Барилга, Хот байгуулалтын газар
• Дорнод аймгийн Байгаль орчны газар
• Хөвсгөл аймгийн Ус, цаг уур орчны шинжилгээний төв
• 20 минутын хот хөгжлийн төв
• Баян-Өлгийн аймгийн Боловсролын газруудтай хамтран нийт  11 удаагийн 22 цагийн 539 /цахим 272 танхим 267/  төрийн албан хаагчдад Цахим засаглал, Цахим хөгжлийн багц хууль, Төрийн байгууллагуудын дотоод үйл ажиллагааны удирдлагын нэгдсэн систем ERP.E-Mongolia  ашиглалт,  Албан бичиг солилцооны дундын систем Docx, Хиймэл оюунаар контент бүтээх, Үндэсний судалгааны нэгдсэн платформ, Мэдээллийн аюулгүй байдлын сэдвийн хүрээнд  сургалтуудыг зохион байгууллаа.