E-Mongolia системээр “Үндэсний баялгийн сан”-гийн санал асуулга авч эхэллээ
Монгол Улсын иргэн өөрийн нэрийн дансандаа нэмэлт орлого хуримтлуулах хүсэлтэй эсэх санал асуулга эхэллээ. “И-Монгол академи” УТҮГ, Гэр бүл, хөдөлмөр нийгмийн хамгааллын яамтай хамтран дээрх санал асуулгыг 05 дугаар сарын 12-ноос 05 дугаар сарын 23-ны өдрийн хооронд E-Mongolia системийн портал болон мобайл сувгуудаар дамжуулан хүлээн авч байна.
- Хүүхдийн мөнгөн тэтгэмжийг хуримтлалын нэрийн дансандаа хуримтлуулахыг дэмжих эсэх;
- Нэмэгдсэн өртгийн албан татвар (НӨАТ)-ын буцаан олголтыг хуримтлалын нэрийн дансандаа хуримтлуулахыг дэмжих эсэх;
- Хувь хүний орлогын албан татвар (ХХОАТ)-ын буцаан олголтыг хуримтлалын нэрийн дансандаа хуримтлуулахыг дэмжих эсэх;
- “Эрдэнэс Тавантолгой” ХК-ийн энгийн ногдол ашгийг хуримтлалын нэрийн дансандаа хуримтлуулахыг дэмжих эсэх сонголтоос та “тийм” эсвэл “үгүй” гэсэн сонголтыг хийх бөгөөд мөн бусад саналаа бичих талбартай.
Иргэн та Үндэсний баялгийн сангийн зохистой бүрдүүлэлт, үр өгөөжтэй зарцуулалтад өөрийн санал бодлоо тусгах энэхүү чухал санал асуулгад идэвхтэй оролцоорой. Таны оролцоо Монгол Улсын ирээдүйн баялгийн хуваарилалтад үнэтэй хувь нэмэр оруулах болно.
Та жолооны үнэмлэхээ E-Mongolia системээр захиалан гэртээ хүргүүлж авах боломжтой
Жолооны үнэмлэх захиалахын тулд заавал олон хоног дугаарлаж, төрийн байгууллагаар явах шаардлагагүй болсон. Цахим хөгжил хурдацтай хөгжиж буй энэ үед E-Mongolia системээр дамжуулан жолооны үнэмлэхээ захиалах боломжтой бөгөөд гар утас, интернэт холболт байхад л хангалттай.
E-Mongolia системээр дамжуулан авах боломжтой үйлчилгээ:
- Шинээр жолооны үнэмлэх захиалах:
- Тээврийн хэрэгсэл жолоодох эрхийн шалгалтад тэнцсэн иргэн E-Mongolia системээр үнэмлэхээ захиалах боломжтой.
- Үүний тулд авто сургуульдаа үнэлгээний хуудас, фото зураг зэргийг урьдчилан хүлээлгэн өгсөн байх шаардлагатай.
- Мэдээлэл “Баталгаажсан” төлөвт шилжсэн тохиолдолд цахим захиалга хийх боломжтой болно.
- Нөхөн авах, хугацаа сунгах, хаясан бол дахин захиалах:
- Жолооны үнэмлэхээ хаяж үрэгдүүлсэн эсвэл хугацаа дууссан бол E-Mongolia-аар шууд захиалж болно.
- Мэдээлэл зөрүүтэй үнэмлэхийг засаж, дахин хэвлүүлэх:
- Хэрэв таны жолооны үнэмлэх дээр овог, нэр, регистрийн дугаар, цусны бүлэг зэрэг хувийн мэдээлэл зөрүүтэй бол дахин захиалахдаа холбогдох талбарыг засаж, шинэчилсэн үнэмлэхээ захиалж болно.
Төрийн цахим үйлчилгээний хүртээмжийг нэмэгдүүлсээр байна
“И-Монгол академи” УТҮГ-аас төрийн үйлчилгээг илүү хялбар, иргэдэд ойр, хүртээмжтэй байлгах тал дээр илүү анхаарч E-Mongolia системд цахимжсан байгаа үйлчилгээнүүдийн талаар сургалт, сурталчилгааг эрчимжүүлэхээр энэ долоо хоногт Төрийн албаны зөвлөл, Шүүхийн шийдвэр гүйцэтгэх ерөнхий газар, Боловсролын ерөнхий газар болон Гаалийн ерөнхий газрын хэвлэл мэдээллийг хариуцсан удирдлага, алба хаагчидтай хамтарсан уулзалтыг зохион байгууллаа.
Уулзалтаар төрийн цахим шилжилт, төрийн үйлчилгээг цахимжуулах, шинэ технологийг нэвтрүүлэх, иргэд олон нийтэд төрийн үйлчилгээг хүртээмжтэй сурталчлах, цаашдын хамтын ажиллагааг өргөжүүлэх чиглэлээр төлөвлөгөө гарган хэрэгжилтийг хангах талаар хэлэлцсэн юм.
“И-Монгол академи” УТҮГ, Улсын хоёрдугаар төв эмнэлгийн цахим шилжилтийг нэмэгдүүлэхэд хамтран ажиллахаар боллоо
“И-Монгол академи” УТҮГ болон Улсын хоёрдугаар төв эмнэлэг урт хугацаанд хамтран ажиллах стратегийн түншлэл эхлүүлж, 2025 оны 05 сарын 16-ны өдөр хамтын ажиллагааны санамж бичигт гарын үсэг зурлаа. Энэхүү санамж бичиг нь эрүүл мэндийн үйлчилгээний цахимжилтыг эрчимжүүлэн нэмэгдүүлэх, байгууллагын дотоод нөөц, чадавхад тулгуурлан хөгжлийн шинэ боломжуудыг бүрдүүлэх, албан хаагчдын эрүүл мэндийг хамгаалах цогц бодлогыг дэмжихэд чиглэж байна.
Хамтын ажиллагааны хүрээнд:
- Иргэдэд зориулсан эрүүл мэндийн боловсролын хөтөлбөр боловсруулж, сургалт, танин мэдэхүй контент хүргэх;
- Эрүүл мэндийн салбарын ажилтнуудад зориулсан мэдээллийн технологийн сургалт, зөвлөмжийг тогтмол зохион байгуулах;
- Цахим цаг захиалга, хариу мэдэгдэл, сануулга зэрэг үйлчилгээг илүү хүртээмжтэй, хэрэглэгч төвтэй болгон сайжруулах;
- Төрийн байгууллагын нэгдсэн ERP системийн нэвтрүүлэлт, ашиглалтад мэргэжлийн зөвлөмж, дэмжлэг үзүүлэх;
- “И-Монгол академи” УТҮГ-ын нийт албан хаагчдыг жилийн урьдчилан сэргийлэх үзлэг, MRI оношилгоонд хамруулах, эрүүл мэндийн тусламж үйлчилгээг хөнгөлөлттэй үнээр авах боломжийг судлан хэрэгжүүлэхэд чиглэж байна.
“И-Монгол академи” УТҮГ-ын алба хаагчдад “Тогтвортой хөгжлийн зорилго” сэдэвт сургалт зохион байгууллаа
Олон улсын туршлагыг түшиглэсэн харилцааны ур чадвар, биеийн хэлэмжийн сургалт төрийн цахим үйлчилгээний чанарт эерэг өөрчлөлт авчрах бас нэгэн чухал алхмын нэг билээ.
“И-Монгол академи” УТҮГ нь алба хаагчдынхаа мэдлэг ур чадварыг нэмэгдүүлэх, сургалт соён гэгээрүүлэх ажлыг шат дараатай зохион байгуулсаар байна. Энэ удаад Олон улсын байгаль хамгаалах сангийн (WWF) Монгол дахь асуудал хариуцсан зөвлөх А.Нинжин нь “И-Монгол академи” УТҮГ-ын албан хаагчдад зориулсан тогтвортой хөгжлийн зорилго (ТХЗ), харилцааны ур чадвар болон биеийн хэлэмжийн тухай сургалтыг зохион байгуулж, чөлөөт уулзалт хийлээ.
“И-Монгол академи” УТҮГ-ын СОНХГ-ын Сургалтын хэлтсээс иргэд олон нийтийн цахим ур чадварыг дээшлүүлэх сургалтыг өдөр бүр зохион байгуулж байна.
Энэ 7 хоногт:
- 1. Хүүхэд, гэр бүлийн хөгжил хамгааллын ерөнхий газар
- 2. Монгол Улсын филармони
- 3. ЦЕГ-ын Стратеги, бодлого, инновац, хөгжлийн алба
- 4. “Сүүн эрчис” ТББ
- 5. Сэлэнгэ аймгийн Мандал сумын ЗДТГ
- 6. Нийгмийн даатгалын ерөнхий газруудтай хамтран 7 удаагийн 13 цагийн сургалтаар нийт 537 төрийн албан хаагч, 25 ахмад настай иргэдийн цахим ур чадварыг дээшлүүлж, Цахим орчин дахь хүүхэд хамгаалал, Технологид суурилсан харилцаа, E-Mongolia системийн ашиглалт, Хиймэл оюунаар контент бүтээх, Төрийн байгууллагуудын дотоод үйл ажиллагааны удирдлагын нэгдсэн систем ERP, E-MONGOLIA гэсэн агуулгуудаар танхим болон цахим сургалтыг зохион байгуулж чадавхжууллаа.
