Өмнө нь иргэд боловсролын лавлагаа, тодорхойлолт авахын тулд сургуулиар орж, бичиг цаас бүрдүүлэх шаардлагатай байсан бол одоо E-Mongolia цахим системийг ашигласнаар хүссэн үедээ, хаанаас ч боловсролын үйлчилгээ авах боломж бүрдлээ. Эдгээр үйлчилгээнүүд цахимжсанаар иргэдийн цаг хугацаа, зардлыг хэмнэж, үйлчилгээг илүү хялбар, хүртээмжтэй болгож байна.
Одоогийн байдлаар иргэд E-Mongolia системээр дамжуулан боловсролтой холбоотой дараах 6 төрлийн лавлагааг цахимаар авах боломжтой.
E-Mongolia системээр дамжуулан авах боломжтой боловсролын лавлагаанууд:
- Суурь боловсролын гэрчилгээ
- Бүрэн дунд боловсролын гэрчилгээ
- Их, дээд сургууль төгссөн тухай дипломын лавлагаа
- Сургалтын байгууллагад суралцаж байгааг батлах тодорхойлолт
- Ерөнхий боловсролын сургуулийн улсын шалгалтын дүнгийн хуулбар
- Элсэлтийн ерөнхий шалгалтын (ЭЕШ) лавлагаа багтаж байна.
Тус үйлчилгээнүүдийг авахын тулд E-Mongolia веб сайт болон аппликейшнд өөрийн бүртгэлээрээ нэвтэрч, “Боловсрол” хэсгээс сонгоод үйлчилгээний нэрийг оруулан хайлт хийснээр шууд авч болно.
